सांसद ज्ञानेन्द्र शाहीले झापा र धनुषा दुई जिल्लामा भन्दा सिंगो कर्णाली प्रदेशमा बजेट कम भएको टिप्पणी गर्दै गर्दा प्रतिनिधि सभामा उनको माइक नै काटिएको

जुम्लाबाट निर्वाचित राप्रपाका सांसद ज्ञानेन्द्र शाहीले कर्णाली प्रदेशमा बजेट कम भएको टिप्पणी गर्दै गर्दा प्रतिनिधि सभामा उनको माइक नै काटिएको छ ।  सांसद शाहीले एमाले अध्यक्ष केपी ओलीको जिल्ला झापा, र भौतिक पूर्वाधार तथा यातायात मन्त्रीको जिल्ला धनुषामा मात्रै धेरै बजेट विनियोजन गरिएको उनले तर्क गरे ।

दुई जिल्लामा भन्दा सिंगो कर्णालीमा बजेट थोरै विनियोजन गरिएको तर्क दिदै गर्दा सांसद शाहीले भुगोल र जनसंख्या जस्ता कुराहरुको तर्क अघि सारेर कर्णालीलाई बजेटमा विभेद गरिएको बताउदै थिए । तर सभामुख देवराज घिमिरेले विषयमा केन्द्रीत नभएको भन्दै माइक बन्द गरिदिए ।  शाहीले भनेका थिए, ‘भौतिक योजना मन्त्रीजी तपाईं नेपालको मन्त्री हो कि धनुषाको मन्त्री हो ? यो भाषा कर्णालीको भाषा हो  ।

यो भाषाको अपमान नगर्नुस । धनुषा जिल्लाका ३ र ४ नम्बर क्षेत्रमा मात्रै ८ अर्व ७७ करोड, झापामा ६ अर्व बजेट विनियाजन गरिएको छ । तर सिंगो कर्णालीलाई जम्मा ७ अर्ब विनियोजन गरिएको छ । यदि भौतिक मन्त्री देशको मन्त्री हो कि झापा र धनुषाको मात्रै मन्त्री हो ? कुनैबेला एमालेको लालकिल्ला थियो कर्णाली, माओवादीका नेता र मन्त्रीहरु कर्णालीले नै बनाएको हो । तर उहाँहरुले किन कर्णालीलाई विभेद गर्नुभयो ?’